बुटवलमा प्रथम वडाध्यक्ष कप सितोरियो प्रतियोगिता हुने
बुटवल । बुटवलमा पहिलोपटक प्रथम वडाध्यक्ष कप सितोरियो प्रतियोगिता हुने भएको छ । आसन्न राष्टपति रनिङ शिल्ड प्रतियोगिताको तयारी स्वरुप प्रतियोगिता सञ्चालन गर्न लागिएको हो ।
बुटवल उपमहानगरपालिका वडा न.१० को आयोजना तथा कालिका कराँते डो एकेडेमीको संयोजकत्वमा उक्त प्रतियोगिता हुन थालेको वडा न.१० का वडाध्यक्ष बलवहादुर पुनले बताएका छन् ।
मंसिर ८ र ९ गते हुने प्रतियोगितामा जिल्लाका १९ वटा टिम सहभागि हुने र पुरुष महिलाका लागि तौल निर्धारण गरिएको कालिका कराँते डो एकेडेमीका अध्यक्ष कृष्ण देवकोटाले जनाए । उनी भन्छन्, वडाको हौसला र आर्थिक सहयोगमा यो प्रतियोगिता गर्न पाउँदा खुसी भएका छौं ।
वडाले १ लाख रुपैयाँ दिएको छ, भने अन्य सहयोग ३५ हजार उठेछ । खर्च धेरै छ त्यही पनि सफल बनाउन आँट गरेका छौं । प्रतियोगितमा सहभागी लिन आउने खेलाडीको पुरुषतर्फ ३५ देखि ५५ र महिलाहरुको लागि ३० देखि ५० किलो तौल तोकिएको छ ।
सहभागी हुने टिमले १० जना खेलाडी, म्यानेजर र कोच एकाएक जनागरी १२ जना समावेश गर्न पाउने उल्लेख छ । तौल समूह अनुसार खेलाडीहरुको नामावली ८ गते डोजोको लेटर प्याडमा छापसहित पठाउनुपर्ने जनाईएको छ ।
प्रतियोगिता कालिका कराँते डो एकेडेमीको हलमा हुने भएको छ ।
