सियारी, माघ २६

रुपन्देही सियारी- ७, पश्चिम अमवा खानेपानी उपभोक्ता तथा सरसफाई संस्थाले १२ औं साधारण सभा सम्पन्न गरेको छ। कार्यक्रम अध्यक्ष झपेन्द्रराज अर्यालको अध्यक्षतामा प्रमुख अतिथि सियारी गाउँपालिका अध्यक्ष थानेश्वर घिमिरे र कार्यक्रम सञ्चालन संस्था सचिव केशव अधिकारीको संचालनमा सम्पन्न भएको हो। सभा सियारी-७ अमवा बोरिङटोल, रूपन्देहीमा संचालन गरिएको हो।

सभामा संस्थाका आर्थिक वर्ष २०७९/८० का वार्षिक प्रतिवेदन, लेखा परीक्षण प्रतिवेदन, आगामी वर्षको बजेट र कार्यक्रमहरूको प्रस्तुति गरिएको थियो। सदस्यहरूले विभिन्न प्रस्ताव र सुझावहरू प्रस्तुत गर्दै संस्थाको आगामी योजनाहरूमा सक्रिय सहभागिता जनाउने प्रतिबद्धता जनाएका छन्।

अध्यक्ष झपेन्द्रराज अर्यालले संस्थाको प्रगति र आगामी योजनाहरूको बारेमा जानकारी दिँदै सदस्यहरूको सक्रिय सहभागिताको महत्त्वलाई जोड दिएका छन्। प्रमुख अतिथि थानेश्वर घिमिरेले संस्थाको कार्यमा सियारी गाउँपालिकाको पूर्ण सहयोग र समर्थन रहने संगै पालिकाले स्थानीय स्तरमा गरेका नवीनतम कार्यक्रमहरुको समेत स्मरण गराए । सभा सफलतापूर्वक सम्पन्न भएकोमा सबै सदस्यहरूलाई धन्यवाद ज्ञापन गरिएको छ।