११ औं संस्करणको फर्साटिकर फुटबल कप पुष ९ गते देखि शुरु

शुद्दोधन ।
रुपन्देहीको शुद्धोधनमा सोमबार देखि फर्साटिकर कपको ११ औं संस्करण हुने भएको छ ।
प्रतियोगिताको आयोजक फर्साटिकर युवा क्लब रुपन्देहीले शनिबार पत्रकार सम्मेलन गरि उक्त कुराको जानकारी गरेको हो । जिल्ला बाहिर ४ तथा जिल्ला भित्रका ८ टिम सहित १२ समूहको सहभागिता रहेको प्रतियोगिताको मुख्यको सहयोग शुद्धोधन गाउँपालिकाको रहेको आयोजक फर्साटिकर युवा क्लबका अध्यक्ष मुकेश कुँवरले बताउनुभयो । पत्रकार सम्मेलनमा बोल्दै उहाँले निरन्तर एक दशक सम्म फर्साटिकर कप संचालनमा महत्वपूर्ण सहयोग गर्नुहुने सम्पूर्ण प्रति धन्यवाद ज्ञापन गर्दै खेल अवलोकनका लागि समेत समस्त खेलप्रेमी दर्शक महानुभावहरुलाई आग्रह गर्नुभयो ।

पुष ९ देखि २१ गते सम्म संचालन हुने प्रतियोगिताका खेल संयोजक अमृत खड्काले विजेता टिमले नगद २ लाख ७५ हजार ५ सय ५५ रुपैया, कप, मेडल, प्रमाणपत्र प्राप्त गर्ने कुराको जानकारी दिनुभयो । यसैगरी उपविजेता टिमलाई नगद १ लाख ३५ हजार ५ सय ५५ रुपैया, कप, मेडल, प्रमाणपत्रबाट पुरस्कक्ककृत गरिने संयोजक खड्काले बताउनु भयो । पत्रकार सम्मेलनमा बोल्दै खड्काले प्रतियोगिताको सर्वोत्कृष्ट खेलाडीलाई १० हजार ५ सय ५५ रुपैया, गोलकिपर, सर्वाधिक गोलकर्ता लाई समेत ५ हजार ५ सय ५५ रुपैया नगद सहित कपबाट पुरस्कृत गरिनुका साथै प्रत्येक खेलको ‘म्यान अफ द म्याच’ ले नगद २ हजार प्राप्त गर्ने कुरा बताउनु भयो ।

यसपाली डिजिटल स्कोर बोर्ड राखिने प्रतियोगितामा ३० हजार दर्शकले खेलअवधि भर अवलोकन गर्ने प्रचारप्रसार संयोजक टेकु भण्डारी बताए । जिल्ला फुटवल संघका रुपन्देही अध्यक्ष लोक पुनले जिल्लामै उत्कृष्ट कपको रुपमा स्थापित गराउन फर्साटिकर युवा क्लब सफल भएको बताउनुभयो ।उहाले फुटबल संघद्वारा गर्ने सम्पुर्ण सहयोग गर्ने समेत प्रतिबद्धता व्यक्त गर्नुभयो ।
करिब २० लाख खर्च हुने अनुमान गरिएको प्रतियोगिताको उद्घाटन खेल पहिलो खेल शुद्धोधन खेलकुद विकास समिती र सम्पुर्ण युवा क्लब सुपौली बिचमा खेल हुनेछ ।