१५ औं पेष्टा खेल महोत्सव सम्पन्न, कुन कुन विद्यालय बने बिजेता? पुरा समाचार

माघ १७
पेष्टा द्वारा आयोजित १५ औं खेल महोत्सव सम्पन्न
फर्साटिकर, रुपन्देही – निजि अङ्ग्रेजी विद्यालय शिक्षक संगठन (पेष्टा) द्वारा आयोजित १५ औं खेल महोत्सव बिहीबार सम्पन्न भएको छ। महोत्सव बुधबार देखि दुर्गा शैक्षिक गृह, सियारी ६ मा सुरु भएको थियो, जसमा विभिन्न विद्यालयका शिक्षक, शिक्षिका र विद्यार्थीहरूले प्रतिस्पर्धा गरेका थिए।
भलिबलमा ज्ञानपुञ्ज विद्यामन्दिरको जीत
प्रतियोगितामा भलिबलतर्फ ज्ञानपुञ्ज विद्यामन्दिरले तिलोत्तमा अङ्ग्रेजी माविलाई हराउँदै १५ औं भलिबल रनिङ शिल्डको उपाधि जित्न सफल भएको छ। विजेता भए संगै पुरस्कार स्वरूप ज्ञानपुञ्ज विद्या मन्दिरले नगद १५ हजार, शिल्ड, मेडल र प्रमाणपत्र प्राप्त गर्यो। दोस्रो स्थानमा रहेको तिलोत्तमा अङ्ग्रेजी माविले नगद १० हजार, शिल्ड, मेडल र प्रमाणपत्र प्राप्त गर्यो भने तृतीय स्थानको सन्तज्योती इङ्लिस बोर्डिङ स्कुलले नगद ५ हजार, शिल्ड, मेडल र प्रमाणपत्र प्राप्त गरेको छ।
महिला डबल ब्याटमिन्टनमा रोजबर्ड एकेडेमीको विजय
महिला डबल ब्याटमिन्टन प्रतियोगितामा रोजबर्ड एकेडेमीले पहिलो स्थान हासिल गर्दै नगद ५ हजार, शिल्ड, मेडल र प्रमाणपत्र प्राप्त गर्यो। दोस्रो स्थानको सिद्दिविनायक सेकेन्डरी स्कुलले नगद ३ हजार, शिल्ड, मेडल र प्रमाणपत्र प्राप्त गर्यो भने तृतीय स्थानको देवसिद्ध बोर्डिङ स्कुलले नगद २ हजार, शिल्ड, मेडल र प्रमाणपत्र प्राप्त गरेको छ।

टेवलटेनिस र हण्डीफोर प्रतियोगितामा पनि पुरस्कार वितरण
विद्यार्थीहरूको टेवलटेनिस प्रतियोगितामा सिद्धीविनायक सेकेन्डरी स्कुलका साहित्य कठेरियाले पहिलो स्थान प्राप्त गरे, जसले नगद २ हजार, शिल्ड, मेडल र प्रमाणपत्र प्राप्त गरे। दोस्रो स्थानको तिलोत्तमा अङ्ग्रेजी माविका अनमोल थापाले १ हजार ५ सय, र तृतीय स्थानको फर्साटिकर सिद्धार्थ बोर्डिङ स्कुलका सम्राट रोका १ हजार, शिल्ड, मेडल र प्रमाणपत्र प्राप्त गरे।
हण्डीफोर प्रतियोगितामा तिलोत्तमा अङ्ग्रेजी माविका नारायण रेस्मीले पहिलो स्थान हासिल गर्दै नगद १ हजार, शिल्ड र प्रमाणपत्र प्राप्त गरे।
पुरस्कार वितरण र सम्मान
प्रतियोगितामा पुरस्कार वितरण पेष्टा रुपन्देही अध्यक्ष इन्द्र क्षेत्री, सियारी गाउँपालिका अध्यक्ष थानेश्वर घिमिरे, मुख्य प्रायोजक प्रीमा एजुकेसन कन्सल्टेन्सीका प्रबन्ध निर्देशक सागर केसि, रेप्सा रुपन्देही अध्यक्ष लोक शर्मा बस्याल र प्याब्सु अध्यक्ष विष्णु गौतम लगायतले संयुक्त रूपमा गरेका थिए। साथै, पेष्टाले खेल महोत्सवको अवसरमा दीर्घ सेवी शिक्षक शिक्षिकालाई सम्मान पनि दिएको थियो।
कार्यक्रमको अध्यक्षता पेष्टा रुपन्देही अध्यक्ष इन्द्र क्षेत्रीले गर्नुभएको थियो भने, वरिष्ठ उपाध्यक्ष चिन्तामणि खरेलको स्वागत र सचिव राजन पौडेलको सञ्चालनमा कार्यक्रम सम्पन्न भएको थियो।