शुद्दोदन, फाल्गुन ११

रुपन्देहीको शुद्दोदन गाउँपालिका ४ सौ. फर्साटिकर स्थित फर्साटिकर माविको खेल मैदानमा संचालन भएको रेप्सा महोत्सव २०८१ अन्तर्गत च्याम्पियनको उपाधी रोजवड एकेडेमीले प्राप्त गर्न सफल भएको छ। रेप्सा महोत्सवको आयोजनामा राइजिङ्ग अङ्ग्रेजी निजी विद्यालय संगठन रेप्साले फागुन ७ गतेदेखि ९ गतेसम्म विभिन्न प्रतियोगिताहरू सम्पन्न गराएको थियो।

रेप्सा महोत्सवमा कक्षा १ देखि ५ सम्मका विभिन्न प्रतियोगिताहरूको मुल्यांकन अनुसार युनाइटेड इङलिस बोर्डिङ स्कुल पहिलो, फर्साटिकर सिद्धार्थ इङलिस बोर्डिङ स्कुल दोस्रो र रोजवड एकेडेमी तेस्रो स्थानमा रहे। त्यस्तै, कक्षा ६ देखि ८ सम्मका प्रतियोगितामा युनाइटेड इङलिस बोर्डिङ स्कुल पहिलो, भुजौली इङलिस स्कुल दोस्रो र रोजवड एकेडेमी तेस्रो भएको थियो। कक्षा ९ देखि १० सम्मका प्रतियोगितामा भने रोजवड एकेडेमी पहिलो, देवसिद्ध इङलिस बोर्डिङ स्कुल दोस्रो र तिलोत्तमा इङलिस बोर्डिङ स्कुल तेस्रो स्थानमा रहे।

नृत्य प्रतियोगितामा देवसिद्ध इङलिस बोर्डिङ स्कुलले पहिलो, शुद्धोधन इङलिस बोर्डिङ स्कुलले दोस्रो र तिलोत्तमा इङलिस बोर्डिङ स्कुलले तेस्रो स्थान हासिल गरे।

रेप्सा महोत्सवको समापन समारोह रेप्सा अध्यक्ष लोक शर्मा बस्यालको अध्यक्षतामा र शुद्धोधन गाउँपालिका अध्यक्ष बिष्णु प्रसाद बस्यालको प्रमुख आतिथ्यतामा सम्पन्न भएको थियो। समापन समारोहमा रेप्सा उपाध्यक्ष रामकृष्ण खनालले स्वागत मन्तव्य राखेका थिए, जबकि रेप्सा सचिव कृष्ण गौतमको सञ्चालनमा कार्यक्रम सम्पन्न भयो।

कार्यक्रममा शुद्दोदन गाउँपालिका प्रवक्ता एवं वडा अध्यक्ष केशव अधिकारी, प्याब्सन रुपन्देहीका वरिष्ठ उपाध्यक्ष कुलराज शर्मा, रेप्सा प्रमुख सल्लाहकार कमल प्रसाद पौडेल, फर्साटिकर माध्यमिक विद्यालयका व्यवस्थापन समितिका अध्यक्ष नरबहादुर घर्ती, शुद्धोधन खेलकुद विकास समितिका संयोजक मुकेश कुवर, भुजौली इङलिस बोर्डिङका अध्यक्ष लगायतले शुभकामना मन्तव्य व्यक्त गरेका थिए।

सम्पूर्ण प्रतियोगिताहरूको मुल्यांकन अनुसार रेप्सा- २०८१ को सर्वोत्कृष्ट विद्यालय रोजवड एकेडेमी घोषित भएको हो।

रेप्सा महोत्सवको आयोजनाले शिक्षा र खेलकुदको समन्वयलाई प्रोत्साहन दिएको र आगामी वर्षहरूमा पनि यस्ता प्रतियोगिताहरूको आयोजनामा वृद्धि हुने विश्वास गरिएको छ।