सियारी, ६ फागुन |
सियारी गाउँपालिका वडा नम्बर ७, सगरमाथा सामुदायिक सिकाइ केन्द्रको आयोजनामा तथा वडा कार्यालयको सहयोगमा एक दिने लागू औषध अभिमुखिकरण तालिम सम्पन्न भएको छ। समुदाय प्रहरी साझेदारी कार्यक्रम अन्तर्गत आयोजित सो तालिममा सिद्धार्थ मा.वि. मदनगंजमा अध्ययनरत कक्षा ११ र १२ का विद्यार्थीहरूलाई सहभागी गराइएको थियो।

कार्यक्रमका प्रमुख अतिथि सियारी गाउँपालिका वडा नम्बर ६ का वडा सदस्य मनिराम थारु रहेका थिए भने तालिमको सहजीकरण इलाका प्रहरी कार्यालय छपिया प्रमुख प्रहरी निरीक्षक शैलेन्द्र पाण्डेले गरेका थिए। कार्यक्रममा लागू औषधको दुरुपयोग, यसको असर, कानूनी प्रावधान तथा समाजमा यसको रोकथामका उपायबारे जानकारी प्रदान गरिएको थियो।

संस्थाका अध्यक्ष प्रेम बहादुर बि.क. को अध्यक्षतामा सम्पन्न उक्त कार्यक्रममा दयानगर सामुदायिक सिकाइ केन्द्रकी सामाजिक परिचालक दुर्गा तिवारीले स्वागत मन्तव्य राखेकी थिइन्। एक दिने अभिमुखीकरण तालिममा वि.व्या.स. अध्यक्ष खिमनाथ सापकोटा विद्यालय प्र.अ. सन्तोष कुमार राना लगायतको सहभागीता संगै तालिमको सञ्चालन सगरमाथा सामुदायिक सिकाइ केन्द्रकी सामाजिक परिचालक यम कुमारी सुनारले गरिन्।

विद्यार्थीहरूको उत्साहजनक सहभागितासहित सम्पन्न कार्यक्रमले लागू औषध सम्बन्धी सचेतना अभिवृद्धि गर्न महत्वपूर्ण भूमिका खेल्ने विश्वास लिइएको छ। आयोजक संस्थाले यस्ता सचेतनामूलक कार्यक्रमलाई निरन्तरता दिने प्रतिबद्धता व्यक्त गरेको छ ।