सियारी, फागुन १३ |

सियारी गाउँपालिका वडा नम्बर ६, मदनगञ्जस्थित श्री सिद्धार्थ माध्यमिक विद्यालयमा मंगलबार ट्राफिक सचेतना कार्यक्रम सम्पन्न भएको छ। कार्यक्रमको उद्देश्य विद्यार्थीहरूमा ट्राफिक नियमको महत्त्वबारे जानकारी प्रदान गर्नु र सुरक्षित यात्राका उपायहरूबारे सचेत बनाउनु रहेको थियो।

कार्यक्रममा इलाका प्रहरी कार्यालय बनघुसरी अन्तर्गत रहेको अस्थायी ट्राफिक पोस्ट छपियाको आयोजनामा उक्त जनचेतना कार्यक्रम सञ्चालन गरिएको हो। कार्यक्रममा ट्राफिक प्रहरी नायब निरीक्षक मोहनकुमार चन्दले ट्राफिक नियमहरूको पालना गर्नुको आवश्यकता बारे विस्तृत जानकारी दिनुभयो। उहाँले पैदलयात्री, साइकल, मोटरसाइकल र सवारी साधन प्रयोग गर्ने सबै नागरिकले पालना गर्नुपर्ने ट्राफिक नियमबारे प्रष्ट पार्नुभयो। साथै, सडक दुर्घटना न्यूनीकरणका लागि सचेत रहनु सबैको दायित्व भएको बताउनुभयो।

यसै गरि विद्यालयका प्रधानाध्यापक सन्तोष कुमार रानाले धन्यवाद ज्ञापन गर्दै ट्राफिक सचेतना कार्यक्रम विद्यार्थीहरूका लागि अति उपयोगी रहेको र यसले उनीहरूको व्यवहारमा सकारात्मक प्रभाव पार्ने विश्वास व्यक्त गर्नुभयो।

ट्राफिक प्रहरी नायब निरीक्षक चन्दले सियारी गाउँपालिकाका सम्पूर्ण माध्यमिक तहका विद्यालयहरूमा क्रमशः यस्ता सचेतना कार्यक्रम सञ्चालन गरिने जानकारी दिनुभयो। उहाँका अनुसार, आगामी दिनमा अन्य विद्यालयहरूमा पनि ट्राफिक नियमसम्बन्धी प्रशिक्षण र सचेतना कार्यक्रमहरू सञ्चालन गरिनेछ, जसले विद्यार्थीहरूलाई जिम्मेवार नागरिक बन्न मद्दत गर्नेछ।

कार्यक्रममा विद्यार्थी र शिक्षकहरुको उत्साहजनक उपस्थिति रहेको थियो। सहभागीहरूले यस्ता कार्यक्रमले ट्राफिक नियम पालनामा जागरूकता बढाउने विश्वास व्यक्त गरेका छन्।