फाल्गुन २५, सियारी |

सियारी–६, मदनगञ्ज स्थित श्री सिद्धार्थ माविमा एसइइ परीक्षा २०८१ मा सहभागी विद्यार्थीहरूलाई ‘शुभकामना प्रदान गर्न तथा फेरि भेटौला’ कार्यक्रम सम्पन्न भएको छ।

कार्यक्रमको अध्यक्षता विद्यालयमा कक्षा ९ मा अध्ययनरत छात्र नेहाल थारुले गरेका थिए। प्रमुख अतिथिका रूपमा विद्यालय व्यवस्थापन समितिका अध्यक्ष खिमनाथ सापकोटाले विद्यार्थीहरूलाई एसइइ परीक्षाका लागि शुभकामना व्यक्त गर्दै मेहनत, अनुशासन र लक्ष्यप्रति दृढ रहन प्रेरित गरे।

विशिष्ट अतिथिका रूपमा विद्यालयका प्रधानाध्यापक सन्तोष कुमार राना उपस्थित थिए। उनले विद्यार्थीहरूको उज्ज्वल भविष्यको कामना गर्दै नियमित अध्ययन र परिश्रमकै माध्यमबाट उत्कृष्ट नतिजा हासिल गर्न सकिने बताए। त्यसैगरी, सहायक प्रधानाध्यापक रामप्रसाद थारुले विद्यार्थीहरूलाई शुभकामना व्यक्त गर्दै परीक्षालाई आत्मविश्वासका साथ सामना गर्न आग्रह गरे।

कार्यक्रममा शिक्षकहरू दीपक देवकोटा, लक्ष्मी भण्डारी, केदार मौर्य, भविन्द्र ज्ञवाली लगायतले पनि विद्यार्थीहरूलाई सफलताको शुभकामना दिएका थिए।

कार्यक्रमको सञ्चालन कक्षा ९ की छात्रा आशिका कार्कीले गरेकी थिइन् भने स्वागत मन्तव्य सुस्मिता बानियाले राखेकी थिइन्। विद्यार्थीहरूको उपस्थिति उत्साहजनक रहेको उक्त कार्यक्रम विद्यालयका अन्य शिक्षकहरूको समेत सहभागितामा सम्पन्न भएको थियो।