बुटवल, ३ फागुन ।

सिद्धि बिनायक सेकेण्डरी स्कूलले आफ्नो रजत महोत्सवलाई विभिन्न सांस्कृतिक र शैक्षिक कार्यक्रमहरूको आयोजना गर्दै भव्य रूपमा मनाएको छ। यस अवसरमा विद्यालय परिसरमा नवनिर्मित मन्टेश्वरी ब्लकको भवनको उद्घाटन पनि गरिएको छ। शनिबार आयोजित एक विशेष कार्यक्रममा रुपन्देही जिल्ला समन्वय समितिका प्रमुख उमाकान्त चपाईले उद्घाटन गर्दै शैक्षिक विकासमा निजि विद्यालयहरूको योगदानको महत्त्वमा प्रकाश पारे।

विद्यालयका प्रधानाध्यापक बासु उपाध्यायले संस्थापकहरूको सोच र योजनालाई निरन्तरता दिँदै विद्यालयले गुणस्तरीय शिक्षामा ध्यान दिँदै शिक्षा प्रणालीमा साना सुधार र व्यवस्थापनका प्रयासहरू गर्दै आएको बताए। उनले शैक्षिक गुणस्तर सुधारका लागि शिक्षकहरूलाई तालिम र अभिमुखिकरणका साथै प्रविधिमैत्री शिक्षण विधि अपनाएको जानकारी दिए। विद्यालयमा पछिल्लो दुई वर्षको अवधिमा धेरै गुणात्मक सुधार भएको छ, जसले दक्ष जनशक्ति उत्पादनमा योगदान पुर्याएको प्रधानाध्यापक उपाध्यायको भनाइ थियो।

रजत महोत्सवको अवसरमा बालबालिकाहरूको प्रतिभा प्रकट गर्ने उद्देश्यले नाटक, नृत्य लगायतका सांस्कृतिक कार्यक्रमहरू आयोजना गरिएको थियो। साथै, विद्यालय परिसरमा विद्यार्थीहरूले तयार गरेको आर्ट कला र विज्ञान सामग्रीहरूको प्रदर्शनी पनि गरिएको थियो, जसमा विद्यार्थीहरूको सिर्जनात्मकता र दक्षता प्रदर्शित भएको थियो।

कार्यक्रममा विद्यालयका पूर्व अध्यक्ष, पूर्व प्रधानाध्यापक, शिक्षक र विद्यार्थीहरूको सम्मान कार्यक्रम पनि आयोजना गरिएको थियो। विद्यालय ब्यवस्थापन समितिका अध्यक्ष अर्जुन खत्रीले बुटवल नगरको तिनाउ नदि पारी रहेका विकट क्षेत्रका समुदायलाई शिक्षाको ज्योति छर्न निजि क्षेत्रबाट नेतृत्व प्रदान गरेको बताए। उनले विद्यालयको योगदानको कदर गर्दै यसले दक्ष नागरिक उत्पादन गरेर देशको समृद्धिमा योगदान पुर्याएको बताएका छन्।

सिद्धि बिनायक सेकेण्डरी स्कूल बुटवल वडा नं १५ स्थित मैनापुरमा करीब आठ कट्टा क्षेत्रफलमा फैलिएको छ र यस विद्यालयमा नर्सरीदेखि १० कक्षासम्म ६ सय भन्दा बढी विद्यार्थीहरू अध्ययनरत छन्।

कार्यक्रममा विद्यालयका पूर्व प्रधानाध्यापक गंगाराम दंगोरियासहित आठ जना प्रधानाध्यापक र पाँच जना पूर्व अध्यक्षहरूलाई सम्मानित गरिएको थियो।

सिद्धि बिनायक सेकेण्डरी स्कूलको रजत महोत्सव विद्यालयको समृद्ध इतिहास र भविष्यको लागि नयाँ दिशा प्रकट गर्ने अवसर साबित भएको छ। यसले विद्यालयको शिक्षामा भएका सुधार र योगदानलाई सम्मान गर्दै भविष्यमा अझ उत्कृष्ट प्रगति गर्ने विश्वास व्यक्त गरेको छ।