बुटवल, फाल्गुन २२

रुपन्देहीमा विविध कार्यक्रमका साथ तमु (गुरुङ) समुदायको मे त्हले प्रीब (धनुष बाण विधा ) पर्व सम्पन्न भएको छ ।

तमु ह्युल छोज धि गुरुङ राष्ट्रिय परिषद रुपन्देही र तमुस्यो ह्युल छोज धि गुरुङ महिला राष्ट्रिय परिषदको संयुक्त आयोजनामा जिल्ला कार्यालय परिसरमा   उक्त कार्यक्रम संचालन भएको हो ।

खेगि पुरोहित मोम बहादुर तमुबाट पुजा आरधना गरि शुरु भएको कार्यक्रममा बोल्दै प्रमुख अतिथि तमु ह्युल छोज धि गुरुङ राष्ट्रिय परिषद रुपन्देहीका अध्यक्ष बिमला तमुले गुरुङहरुको परम्परा र संस्कारलाई संरक्षण गर्नु पर्नेमा जोड दिनुभयो । उहाँले लोप हुदै गईरहेको गुरुङको संस्कृतिलाई प्रवर्दन एवं जगेर्ना गर्नका लागि सबै लाग्नु पर्ने बताउनुका साथै देश तथा विदेश मा रहनुहुने समस्त गुरुङ समुदायलाई शुभकामना समेत व्यक्त गर्नुभयो ।

यसै गरि कार्यक्रममा बोल्दै विशिष्ट अतिथि तमु (गुरुङ) मातृभाषा अभियन्ता भिम तमुले तमु जातिहरुको पर्वका महत्वका विषयमा प्रकाश पार्नु भयो । अभियन्ता तमुले विभिन्न क्षेत्रमा छरिएर रहनुभएका सम्पूर्ण गुरुङहरु एकताबद्द भई तमु पर्व, भाषा र संस्कारलाई संरक्षण गर्नुपर्ने बताउनुभयो ।

विशेष पर्वका अवसरमा विविध खेलकुदको पनि आयोजना गरिएको थियो । धनुष बाण खेलमा रस बहादुर तमु प्रथम भएका छन् भने कुर्सि दौड तर्फको श्रीमाया तमु प्रथम, मिना तमु द्वितीय र हण्डीफोरमा मिन बहादुर तमु विजेता भएका हुन् । विजेता सम्पुर्णलाई प्रमुख अतिथि तमु ह्युल छोज धि गुरुङ राष्ट्रिय परिषद रुपन्देही जिल्ला अध्यक्ष बिमला तमुले पुरस्कार राशि हस्तान्तरण गर्नुभयो ।

तमु (गुरुङ) मातृभाषा अभियन्ता भिम तमु, माङ्गि जिल्ला अध्यक्ष जुन माया तमु, तमु ह्युल छोज धी जिल्ला बरिष्ठ उपाध्यक्ष राम बहादुर गुरुङ लगायतका विशिष्ट व्यक्तित्वहरु उपस्थिति रहेको कार्यक्रमको संचालन तमु ह्युल छोज धि गुरुङ राष्ट्रिय परिषद रुपन्देहीका  सचिब ओम प्रकाश तमुले गर्नु भएको हो ।