शुक्रबार, २१ चैत्र २०८१ २०:१६

रुपन्देहीमा ल्होसार–२०८० को तयारी तीव्र

बिहीबार, ५ पुष २०८० १३:४१

रुपन्देही, ५ पुस ।
तमु ह्युल छोज धि गुरुङ राष्ट्रिय परिषद जिल्ला समिति रुपन्देहीले गुरुङहरुको महान पर्व ल्होसारबारे जानकारी दिन पत्रकार सम्मेलन गरेको छ । बिहीबार जिल्ला परिषद कार्यालय प्रांगण रामनगरमा पत्रकार सम्मेलन गरी गुरुङहरुको महान पर्व पौष पन्ध्र मुप्री ल्हो (गिद्ध बर्ग) ल्होसार कार्यक्रमलाई सम्पन्न गर्न कार्यविभाजन गरिएको जानकारी दिए ।

त्यसै गरी पुस ११ गते बिहान ८ बजे वरिष्ठ उपाध्यक्ष राम बहादुर गुरुङको संयोजकत्वमा जिल्लाभरीका इकाई समितिहरुले नगरका विभिन्न ठाउँहरुमा सरसफाई कार्यक्रम गर्ने भएको छ । त्यस्तै १२ गते बिहान ८ बजे सदस्य शेरजंग गुरुङको संयोजकत्वमा रक्तदान कार्यक्रम गर्ने, १३ गते बिहान ८ बजे  सचिव ओम प्रकाश गुरुङ र सदस्य दूध बहादुर गुरुङको संयोजकत्वमा मानव सेवा आश्रम सुख्खानगरमा दान र जिल्लाभरी साँझ ५ बजे दिपावली गरिनेछ ।

त्यस्तै १४ गते संगठन सचिव आशा गुरुङ र सदस्य श्रीमाया गुरुङको संयोजकत्वमा पुष्पलाल पार्कबाट बिहान १० बजे बृहत् झाँकीसहितको शान्ति र्‍याली नगर परिक्रमा गरी इकाईस्तरको नृत्य प्रतियोगिता कार्यालयको प्रांगणमा गरिने र पुस १५ गते बिहान ११ बजे उपाध्यक्ष गंगा गुरुङको संयोजकत्वमा जिल्ला समिति कार्यालयको प्रांगण रामनगरमा शहरी विकास मन्त्री सीता गुरुङको प्रमुख आतिथ्यतामा बृहत् ल्होसार सार्वजानिक समारोहका साथै विविध साँस्कृतिक कार्यक्रम र छेलो प्रतियोगिता पनि आयोजना गरिएको मूल संयोजक बिमला गुरुङ्ले जानकारी दिइन् ।

कार्यक्रममा ल्होसार पर्वको सन्दर्भमा पत्रकारहरुको जिज्ञासाबारे खेमालिपी केन्द्रीय भाषिक सल्लाहकार बालनर्सिङ गुरुङले जानकारी गराएका थिए । केन्द्रीय सदस्य तथा लुम्बिनी प्रदेश प्रमुख जेबि गुरुङ तमु (गुरुङ), सञ्चारकर्मी संघ नेपालका केन्द्रीय सचिव कुमार गुरुङ लगायतले ल्होसार पर्वबारे आफ्ना भनाइ राखेका थिए ।

पत्रकार सम्मेलन संयोजक प्रचार सचिव खेमन सिङ गुरुङ, ल्होसार मूल संयोजक जिल्ला अध्यक्ष विमला गुरुङको अध्यक्षता तथा सचिव ओमप्रकाश गुरुङको सञ्चालनमा सम्पन्न भएको थियो ।