रुपन्देही–३(ख) मा उमाकान्त चपाईंको प्यानल विजयी, क्षेत्रीय नेतृत्व चयन

निरन्तर वर्षाका कारण बागमतीमा उच्च बहाव, तटीय क्षेत्रमा सतर्कता आवश्यक

निरन्तर वर्षाका कारण बागमती नदी र यसका सहायक खोलाहरूमा जलसतह अत्यधिक बढेको छ । उपत्यकाको पानी बाहिरिने मुख्य प्राकृतिक निकास मार्ग चोभार गल्छीमा बागमती नदी उर्लिएर तीव्र वेगका साथ बगिरहेको छ । काठमाडौँ उपत्यकाका बागमती, विष्णुमती, धोबीखोला, मनोहरालगायतका सबै साना–ठूला खोलाहरूको बाढी मिसिएर चोभार गल्छी हुँदै बाहिरिने गर्दछ । गल्छीको साँघुरो भू–बनोटका कारण यहाँ बागमतीको बहाव उर्लिएको देखिएको छ । उपत्यकाभित्र नदीहरूको जलसतह निरन्तर उकालो लागेपछि च्यासल, थापाथली, टेकु, बल्खु तथा बल्खु–सुन्दरीघाट क्षेत्रका करिडोर सडकहरूमा बाढी पस्ने र डुबान हुने जोखिम बढेको छ । सुरक्षा निकायले बागमती र विष्णुमती करिडोरका सडकहरूमा पानी ओभरफ्लो हुन सक्ने भन्दै तटीय करिडोर भएर यात्रा नगर्न र वैकल्पिक बाटो प्रयोग गर्न सर्वसाधारणलाई आग्रह गरेका छन्। नेपाल प्रहरी, सशस्त्र प्रहरी बल तथा स्थानीय विपद् व्यवस्थापन टोलीले नदी किनाराका सुकुम्बासी बस्ती तथा होचा भूभागहरूमा गस्ती र निगरानी बढाएका छन्। नेपाल मौसम विज्ञान विभागले बागमती नदी जलाधार क्षेत्रमा भारी वर्षा भइरहेकाले जलसतह खतराको तह नजिक पुग्न सक्ने चेतावनी दिँदै नदी तटीय क्षेत्रका बासिन्दालाई सतर्क रहन र नदी किनारमा नजान अनुरोध गरेको छ । बंगालको खाडीमा बनेको न्यून चापीय प्रणालीको असरले उपत्यकासहित देशका विभिन्न भागमा वर्षा अझै केही समय जारी रहने सम्भावना रहेकाले थप सतर्कता अपनाउन प्रशासनले अनुरोध गरेको छ ।